දයාසිරි ප‍්‍රා.ලේ කොට්ඨාශයට එක බැගින් ජිම් දෙයි

ප‍්‍රාදෙශීය ලේකම් කොට්ඨාශයට එක බැගින් ඇවිදින මංතීරුවක් හා කාය වර්ධන මධ්‍යස්ථානයක් (ජිම් එකක්) ලබා දීමට ක‍්‍රීඩා අමාත්‍යාංශය කටයුතු කරන බව අමාත්‍ය දයාසිරි ජයසේකර මහතා ප‍්‍රකාශ කොට ඇත. එසේම, මේ වසර අවසන්වීමට ප‍්‍රථම හැම රාජ්‍ය ආයතනයකම කාය වර්ධන මධ්‍යස්ථානයක් ලබා දෙන බව ද ඔහු පවසයි. තවද, ක‍්‍රීඩාවට දක්‍ෂ පාසැල් සිසුන් සොයා පාසැලින් පාසැලට ක‍්‍රීඩා නිලධාරීන් පිරිසක් යැවීමටකටයුතු යොදන බවද පවසා සිටී. ක‍්‍රීඩාව නංවාලීමට හා ජනතාවගේ ශරීර සෞඛ්‍ය සුරැකීම උදෙසා මෙම වැඩ පිළිවෙල කරගෙන යන බව ද ඔහු තවදුරටත් ප‍්‍රකාශ කර සිටී.

පළාත් පාලන මැතිවරණයට අපේක්‍ෂකයන් තෝරාගැනීම සඳහා එජාපය ඉල්ලූම්පත් කැඳවයි

ලබන වසර මැදදී පැවැත්වීමටනියමිත පළාත් පාලන මැතිවරණය සඳහා අපේක්‍ෂකයන් තෝරාගැනීමට එක්සත් ජාතික පක්‍ෂය දැනටමත් ඉල්ලූම්පත‍්‍ර කැඳවා ඇති අතර, මේ සඳහා 30,000කට අධික ඉල්ලූම්පත‍්‍ර ලැබී ඇති බව සිරිකොත ආරංචිමාර්ග පවසයි. මේ අතර, ශ‍්‍රී ලංකා නිදහස් පක්‍ෂය අපේක්‍ෂකයන් ඒකාබද්ධ විපක්‍ෂයේ විසින් අලූතින් පිහිටුවීමට යන අලූත් පක්‍ෂයේ නාම යෝජනා ලබා ගැනීමට බලාපොරොත්තුවෙන් සිටින බව ද දැනගන්නට ඇත.

නිදහස් උත්සවය සංවිධාන කටයුතු ගැන අගමැති පැහැදීමක් නෑ

පෙබරවාරි 04දාට යෙදී ඇති නිදහස් උත්සවය සංවිධානය කිරීම භාරව ඇත්තේ වජිර අබේවර්ධන අමාත්‍යවරයාගේ අමාත්‍යාංශය වන රාජ්‍ය පරිපාලන හා ස්වදේශ කටයුතු අමාත්‍යාංශයටය.

මේ සඳහා එම අමාත්‍යාංශය විසින් පසු ගියදා අග‍්‍රාමාත්‍යවරාගේ ප‍්‍රධානත්වයෙන් රැස්වීමක් පවත්වා ඇති අතර, මෙම රැස්වීමට පැමිණීමට වජිර අබේවර්ධන අමාත්‍යවරයා ප‍්‍රමාද වී ඇත. සාමාන්‍යයෙන් නියමිත වේලාවටම රැස්වීම්වලට පැමිණෙන අගමැතිවරයා වජිර අබේවර්ධන අමාත්‍යවරයාගේ ප‍්‍රමාදවීම ගැන දැඩි ලෙස කෝපවී ඇත. එහිදී එම රැස්වීමේ න්‍යාය පත‍්‍රය අතට ගත් අගමැතිවරයා, එම සම්පූර්ණ න්‍යාය පත‍්‍රයම විවේචනය කරමින් පාසැල් ළමුන් මෙම නිදහස් උත්සවයට සම්බන්ධ කරවා ගැනීම ගැන දැඩි ලෙස කෝපයෙන් කථා කොට ඇත. රාජ්‍ය උත්සවවලට ප‍්‍රතිපත්තියක් ලෙස අග‍්‍රාමාත්‍යවරයා පාසැල් සිසුන් සහභාගී කරවීම නවතා දමා තිබියදී මෙම උත්සවයට පාසැල් ළමුන් කැඳවීමට කටයුතු කලේ කවුදැයි විමසූ අග‍්‍රාමාත්‍යවරයා නිලධාරීන්ට දැඩි ලෙස කෝපාවිශ්ටව බැන වැදී රැස්වීම හරිහැටි සංවිධානය කොට තමාට දන්වන මෙන් පවසා රැස්වීමෙන් පිටව ගොස් ඇත.

දයාගේ ඉඩමක් චම්පික ගත්තා යැයි චෝදනාවක්

නියෝජ්‍ය අමාත්‍ය දයා ගමගේ මහතාට අයත් බොරලැස්ගමුවේ අක්කර 10ක ඉඩමක් මෙගා පොලිස් අමාත්‍යංශය පවරා ගත් බව කියමින් අමාත්‍ය චම්පික රණවක මහතාට එරෙහිව දයා ගමගේ මහතා ජනාධිපති මෛත‍්‍රිපාල සිරිසේන මහතාට පැමිණිල්ලක් ඉදිරිපත් කොට ඇත. මෙහිදී මෙම පැමිණිල්ල ඉදිරිපත්කරන අවස්ථාවේදී මෛත‍්‍රීපාල සිරිසේන මහතා සිටි ස්ථානයට චම්පික රණවක ඇමතිවරයා පැමිණීමෙන් පසු අමාත්‍යවරු දෙදෙනා අතර බරපතල වාග් හුවමාරුවක් සිදුවී ඇති බව ද වාර්තා වේ.

මංගලට එරෙහිව ආණ්ඩුව තුලින් බරපතල විරෝධයක්

විදේශ කටයුතු අමාත්‍ය මංගල සමරවීම මහතාට එරෙහිව ආණ්ඩුව ඇතුළින් බරපතල විරෝධයක් ගොඩනැගී ඇත. මෙය පළමුවෙන් ශ‍්‍රී ලංකා නිදහස් පක්‍ෂය පැත්තෙන්ගොඩනැගුණත් දැන් එයට අගමැතිවරයා ඇතුලූ එක්සත් ජාතික පක්‍ෂයේ මැති ඇමතිවරු රැසක්ද එකතු වී සිටිති. එයින් ප‍්‍රබල ලෙස පෙනී සිටින්නේ අමාත්‍ය රාජිත සේනාරත්න මහතා සහ අමාත්‍ය රිෂාඞ් බදුයුදීන් මහතායි. පසුගියකැබිනට් මණ්ඩලයට මංගල සමරවීම මහතා විසින් ගෙන ආ ඉරාක තානාපති කාර්යාලය, වසා දැමීමේ යෝජනාව කැබිනට් මණ්ඩලය තුළ පරාජය කිරීමට තරම් මෙම විරෝධතාවය ඉහල ගොස් ඇත. මෙම මංගල විරෝධී ඇමතිවරු වන්නේ අනුර යාපා, සුසිල් පේ‍්‍රම්ජයන්ත්, රාජිත සේනාරත්න, රිෂාඩු බදියුදින්, මහින්ද සමරසිංහ, ෆායිස් මුස්තාපා, සරත් අමුණුගම, තලතා අතුකෝරල යන අයයි.

ජනාධිපති මෛත‍්‍රීපාල සිරිසේන මහතා ද මංගල සමරවීර මහතා ගැන එතරම් පැහැදීමකින් නැති බව වාර්තා වේ.

 

ආණ්ඩුවට එරෙහිව සිවිල් සංවිධාන යුද්ධයක් අරඹයි

යහපාලන ආණ්ඩුව ගෙන ඒම සඳහා විශාල වැඩකොටසක් කළ සිවිල් සංවිධාන රාශියක් එකට එක්වී ආණ්ඩුවට එරෙහිව විරෝධතා ව්‍යාපාරයක් පවත්වාගෙන යාමට පෙබරවාරි 04 වනදා සිට තීරණය කොට තිබේ.

මෙම ආන්ඩුව පිහිටුවා වසරක් ගතවී ඇතත් පසුගිය කාලයේ අපරාධකරුවන්ට දඩුවම් ලබා නොදීම සොරුන් වංචාකරුවන් දූෂිතයින් නීතිය ඉදිරියට නොගෙනීම ආන්ඩුව පිහිටුවීමේදී ලබාදුන් පොරොන්දු ඉටු නොකිරීම සම්බන්ධයෙන් මෙම විරෝධතාවයන් දැක්වීමට කටයුතු කරනු ඇත. මේ පිළිබඳව පසුගිය 14 වැනිදා එම සිවිල් සංවිධාන විසින් අගමැතිවරයා මුණගැසී සාකච්ඡා පවත්වා ඇති අතර, ඊයේ (18) ජනාධිපති මෛත‍්‍රීපාල සිරිසේන මහතා හමුවී සාකච්ඡා පවත්වා ඇත. මෙම සාකච්ඡාවලින්ද එතරම් ප‍්‍රථිපලයක් නැති බව පවසන එම සිවිල් සංවිධාන එකමුතුව, මේ ආණ්ඩුවේ සමහර මැති ඇමතිවරු හොරුන් දූෂිතයින් ආරක්‍ෂා කිරීමට කටයුතු කරන බවත් ඔවුන් ජනාතවගෙන් සමාව ගත යුතු බව පවසමින් මෙම විරෝධතාවය පැවැත්වීමට සූදානමින් සිටී.

රුපියල් 2500/- පඩිය වැඩිවීමට එරෙහිවන්නන්ට ගිනි තැබිය යුතුයි – වඩිවේල් සුරේෂ්

වතු කම්කරුවන්ට මේ මස 20 වැනි දින සිට රු. 2500/-ක වැටුප් වැඩිවීමක් ලබා දෙන බව කම්කරු අමාත්‍ය ජෝන් සෙනෙවිරත්න මහතා ප‍්‍රකාශ කොට ඇත.

මෙම රුපියල් 2500/- වැටුප් වැඩිවීම වතු කම්කරුවන්ට ලබාදීමේදී එයට බාධාකරන සියලූ දෙනාම මුලින්ම ගිනි තැබිය යුතු යැයි පාර්ලිමේන්තු මන්ත‍්‍රී වඩිවේල් සුරේෂ් මහතා ප‍්‍රකාශකොට ඇත.

 

 

 

සෝභිත හිමි අපවත් වුනාද? අපවත් කළාද?

පූජ්‍ය මාදුළුවාවේ සොභිත හිමිගේ අපවත්වීම පිළිබ‍ඳව සැකයක් පැතිර යමින් පවතී.

යහපාලන ආණ්ඩුව ගෙන ඒම සඳහා මුලික වී කටයුතු කල උන් වහන්සේට විශාල දේශපාලන සතුරන් ප්‍රමාණයක් රටේ සිටි බවට සැකයක් නැත. උන් වහන්සේට වැළඳී තිබූ දියවැඩියා රෝගය, වකුගඩු රෝගය පිළිබඳ හා හෘද රෝග පිළිබදව ඉතිහාසය දන්නා වූ නවලෝක රෝහලට ඇතුලු නොවී සෙන්ට්‍රල් රෝහලට ඇතුලු වී හෘද රෝග සැත්කම් සිදු කිරීම හා එම සැත්කම්වලින් පසුව මාලඹේ නෙවිල් ප්‍රනාන්දු රෝහලට ඇතුලු වීම පිළිබඳ යම් යම් සැක මතුවෙමින් තිබේ. සෙන්ට්‍රල් රෝහලේ උන්වහන්සේගේ ප්‍රතිකාර කළ ඇඳ ඉහපත් අතුරුදහන් වීම පිළිබඳව යම් යම් සැක මතුවෙමින් පවතී. මෙවැනි තත්ත්වයක් තුළ උන්වහන්සේගේ අපවත්වීමත් ගංගොඩවිල සෝම හිමියන්ගේ අපවත්වීම පිළිබඳ මෙන්ම සැකයක් සමාජය තුළ මතුවෙමින් පවතී.

කුමාර් නැවතත් කැලෑ පනීද?

සංචාරක වීසා මගින් ශ්‍රී ලංකාවට පැමිණ එම වීසා කාලය අවසානවීමෙන් පසු සැඟවෙමින් සිටි පෙරටුගාමී පක්ෂයේ නායක කුමාර් ගුණරත්නම්, කෑගල්ල අඟුරුවැල්ලේ සිය මවගේ නිවසේ සැඟවී සිටියදී ඊයේ කෑගල්ල පොලීසිය විසින් අත්අඩංගුවට ගෙන කෑගල්ල මහේස්ත්‍රාත් උසාවියට ඉදිරිපත් කිරීමෙන් පසු මේ මස 18 දක්වා රිමාඩ් භාරයේ තැබීමට නියෝග කොට තිබේ.

මෙතෙක් වීසා නොමැතිව සැඟවෙමින් සිටි කුමාර් ගුණරත්නම් හදිසියේ අත්අඩංගුවට ගැනීමට හේතුව වීසා නොමැතිව සිටීම ද එසේ නැත්නම් ඔහු සැඟවී කරන දේශපාලන කටයුතු පිළිබඳ රජයට ලැබී ඇති තොරතුරු තුළින් නැවතත් ඔවුන් කැරැල්ලකට සූදානම් වෙනවාද? යන කරුණ බව ද විශ්වාස කටයුතු මාර්ගයකින් දැනගන්නට ලැබී තිබේ.

කුමාර් ගුණරත්නම් ජනතා විමුක්ති පෙරමුණ තුළ සිටියදී ද රහසිගත දේශපාලනයේ යෙදුනු අතර ඔහු ජනතා විමුක්ති පෙරමුණේ 80 දශකයේ කැරැල්ලේ සන්නද්ධ අංශය භාරව සිටි නායකයා යැයි ද, විජයවීරගේ මරණයෙන් පසු ඔහු නැවතත් ජනතා විමුක්ති පෙරමුණ තුළ සන්නද්ධ අංශය භාරව රහසිගත දේශපාලනයේ යෙදුනු අයෙකු බව ද ප්‍රකට කරුණකි. ජනතා විමුක්ති පෙරමුණ සන්නද්ධ අරගලය අත්හැර ප්‍රජාතන්ත්‍රවාදී දේශපාලනයට පිවිසීම නිසා ඇතිවූ දේශපාලන මතවාදී අරගලය නිසා ඔහුඇතුලු පිරිස පක්ෂයෙන් ඉවත් කළ අතර ඔවුන් ‘පෙරටුගාමී පක්ෂය’ නමින් නව පක්ෂයක් බිහිකර ගත්තේය. මොවුන් ජනතා විමුක්ති පෙරමුණෙන් ඉවත්වීමෙන් පසු ජනතා විමුක්ති පෙරමුණ සතුව තිබූ විශ්වවිද්‍යාල ශිෂ්‍ය බලය ජනතා විමුක්ති පෙරමුණෙන් ගිලිහී ගිය අතර අන්තර් විශ්වවිද්‍යාල ශිෂ්‍ය බල මණ්ඩලයේ බලය පෙරටුගාමී පක්ෂය සතු විය.

පසුගියදා සිදුවූ ජාතික උසස් ගණකාධිකරණ ඩිප්ලෝමා (එච්.එන්.ඩී.ඒ.) සිසු අරගලය ඇතුලු සියලුම සිසු අරගලයන් අන්තර් විශ්වවිද්‍යාල බල මණ්ඩලය හරහා මෙහෙයවා ඇත්තේ පෙරටුගාමී පක්ෂය බවට තොරතුරු ලැබී ඇති නිසා මොහු අත්අඩංගුවට ගැනීම ඉක්මන් වූ බව ද, විශ්වාසදායක ආරංචිමාර්ග කියයි. කෙසේ වෙතත් පෙරටුගාමී පක්ෂය විසින් ඉදිරි කාලයේදී ආණ්ඩුබලය ලබා ගැනීම නිසා සන්නද්ධ අරගලයකට සූදානම් වෙනවාද යන සැකයක් රාජ්‍ය බුද්ධි අංශ තුළ ඇතිවී තිබෙන බව යම් යම් ආරංචිමාර්ග සඳහන් කරයි.

කුමාර් ගුණරත්නම්ගේ වැඩිමහල් සොහොයුරා වූ චන්ද්‍රම් ගුණරත්නම් ද ජනතා විමුක්ති පෙරමුණේ 80 දශකයේ ශිෂ්‍ය නායකයාව සිටි අතර, ඔහු අන්තර් විශ්වවිද්‍යාල බල මණ්ඩලයේ කැඳවුම්කරු ද විය. පසුව පේරාදෙණිය විශ්වවිද්‍යාලයේ මහා ශිෂ්‍ය සංගමයේ සභාපතිවරයා ද වූ ඔහු, ජනතා විමුක්ති පෙරමුණ විසින් මෙහෙය වූ 87 කැරැල්ලේදී හමුදාව විසින් ඝාතනය කරන ලද බව දැනගන්නට ඇත.

වර්ෂාව නිසා එළවළු මිල අධික වේ

පවතින වර්ෂා කාලගුණය නිසා දඹුල්ල ආර්ථික මධ්‍යස්ථානය ඇතුලු සියලුම ආර්ථික මධ්‍යස්ථානව එලවළු මිල 100%කින් ඉහල ගොස් ඇත.

වර්ෂාව නිසා එළවළු වගාව විනාශ වීමත්, ඒවා නෙලා ගැනීම අසිරුවීමත් නිසා ආර්ථික මධ්‍යස්ථානවලට පැමිණෙන එළවළු තොග ප්‍රමාණය සීමා වී ඇත. මේ හේතුව නිසා මෙසේ එළවළු මිල ඉහල ගොස් තිබේ.

දඹුල්ල ආර්ථික මධ්‍යස්ථානය ඇතුලු ආර්ථික මධ්‍යස්ථාන ගණනාවක ඊයේ බෝංචි රු. 200/=ත් 240/=ත් අතර, කැරට් රු. 100/=ත් 140/=ත් අතර, මාළු මිරිස් 220/=ත් 260/=ත් අතර, ලීක්ස් රු. 50/=ත් 70/=ත් අතර, අමු මිරිස් රු. 400/=ත් 500/=ත් අතර, තක්කාලි රු. 80/=ත් 100/=ත් අතර, මෑකරල් රු. 85/=ත් 105/=ත් අතර, පතෝල රු. 60/=ත් 80/=ත් අතර, වම්බටු රු. 80/=ත් 90/=ත් අතර, දඹල රු. 100/=ත් 130/=ත් අතර, කරවිල රු. 120/=ත් 140/=ත් අතර, වැටකොලු රු. 50/=ත් 70/=ත් අතර, බණ්ඩක්කා රු. 50/=ත් 60/=ත් අතර ආදී වශයෙන් එළවළු මිල ඉහල ගොස් තිබුණි.